Eldstöðvaganga

Reykjanesskaginn er um 1700 kerkílómetrar að flatarmáli og byggður upp af eldvirni að öllu leyti eins og Íslands í heild sinni. Reykjanesskagi er hluti af gosbeltinu sem liggur þvert í gegnum Ísland og er í raun ofansjávarhluti af Reykjaneshryggnum sem er hluti af Atlantshafshryggnum. Landslag á Reykjanesskaga er bæði ungt og ævintýralegt þar sem eldvörp, gígar, hraun, hellar, sprungur, jarðhiti og misgengi spila stórt hlutverk. Hraun frá nútíma þekja mikinn hluta skagans og mörg þeirra eru frá sögulegum tíma en á fyrstu öldum Íslandsbyggðar var mikil eldvirkni á Reykjanesskaga.

Extreme Iceland býður fjölmargar gönguferðir um Reykjanesskaga, jafnt að vetri sem og sumri, degi sem nóttu. Við sníðum ferðir að þörfum hvers og eins, vistvænar gönguferðir þar sem virðing fyrir náttúrunni spilar stórt hlutverk ásamt því að fræðast um jarðfræði svæðisins.

Þessi fjögurra daga eldstöðvaganga um Reykjanesskagann er sumarferð enda gist í tjöldum þrjár nætur. Yfir hásumarið er einnig tilvalið að fara þessa leið á nóttunni ... það er að sofa á daginn en ganga á nóttunni ... þegar íslenska sumarnóttin skartar sínu fegursta og bjart er allan sólarhringinn.

Bifreið  flytur vistir, tjöld og annan búnað en við látum nesti til dagsins og myndavélina duga sem farangur á göngunni. Um hálftíma akstur er frá Reykjavík að skíðasvæðinu í Bláfjöllum en þar hefst gangan. Við göngum yfir dyngjuna Strompa og þaðan að gígnum Kistufelli í Brennisteinsfjöllum. Gígurinn er um 400 metra breiður og frá honum rann hraun til þriggja átta fyrir um 4000 árum. Kistuhraun og gígurinn Kista verða næst á vegi okkur en þaðan rann mikið hraun nálægt árinu 1000. Er sú veröld mikið sjónarspil. Næst verður stefnan tekin á Eldborg (570 m y. s.) í Brennisteinsfjöllun. Þar gefst ævintýralegt útsýni svo sem til Vestmannaeyja og Eyjafellsjökuls í austri. Hraunið úr Eldborg þekur um 36 ferkílómetra og hefur víða runnið niður á láglendi. Við skoðum eldstöðina Vörðufellsborgir en skammt fyrir neðan þær bíða tjöldin okkar og kvöldmaturinn við fallega tjörn fjarri ys og þys veraldarinnar.

Að morgni tökum við stefnuna í vesturátt yfir hraun og móbergshryggi. Við stöldum um sinn við Austurengjahver enda hann með stærri og öflugri hverum á Íslandi og þótt víðar væri leitað. Sprengigígurinn Grænavatn verður á vegi okkar. Það liggur í sprengigíg og er 45 metra djúpt. Við veltum fyrir okkur græna litnum á vatninu. Í og upp af Krísuvík eru landið sundursoðið af hverum og ævintýralegt um að litast. Á Vígdísarvöllum bíða tjöldin okkar og grillið orðið heitt.

Á þessum þriðja degi göngunnar þræðum við fjallavötn, Djúpavatn, Grænavatn og Spákonuvatn verða öll á vegi okkar. Við göngum meðal annars að Hvernum eina og þaðan á Höskuldarvelli. Þar verður kvöldvaka, farið í leiki og sagðar sögur.

Eftir orkuríkan morgunverð við tjaldskörina á Höskuldarvöllum göngum við að og á fjallið Keili (378 m y. s.) og þaðan að gíg Þráinsskjaldar sem er ein mesta dyngjan á  Reykjanesskaga. Þaðan göngum við vestur að Bláa lóninu en á þeirri leið eru fjölmargir gígar, hraun, gjár, hellar og svo mætti áfram telja. Við látum gönguþreytuna líða úr okkur í Bláa lóninu frameftir kvöldi. Höldum síðan til Reykjavíkur þar sem þetta fjögurra daga ferðalag endar á sama stað og það hófst.