Laufbalavatnshellar í Skaftáreldahrauni

Eitt allra magnaðasta hellasvæði á Íslandi

Það var 8. júní 1783 að Skaftáreldar hófust og gaus þá suðvesturhluti gossprungunnar. Á fimmta degi gossins, 12. júlí, byltist hraunið fram úr Skaftárgljúfri við Skaftárdal og breiddist þar út. Á níunda degi gossins, 16. júní, kom ógnarlegur eldgangur fram úr Skaftárgljúfri og gljúfrið, sem var 100 til 200 metra djúpt og 30 til 40 kílómetra langt, var barmafullt af glóandi hrauni. Næstu vikur æddi hraunið yfir sveitirnar og eyddi bæjum. Þann 29. júlí hófst gos í norðausturhluta sprungunnar sem nú heitir Lakagígar og er lengsta gígaröð á jörðinni. Hraunið kom fram úr gljúfri Hverfisfljóts 7. ágúst. Síðasta eldkastið kom fram úr gljúfri Hverfisfljóts dagana 25.-29. október. Gosinu í Lakagígum, Skaftáreldum, er talið hafa lokið 7. febrúar 1784 en þá sáust þar síðast eldar.

Eftir stendur hraunið, um 656 ferkílómetrar og um 14 rúmkílómetrar. Á annað hundrað hraunhellar eru þekktir í hrauninu, bæði stórir og litlir. Í austurálmu hraunsins, norðaustan Laufbalavatns, er eitt allra magnaðasta hellasvæði á Íslandi. Hvergi annars staðar á landinu er vitað um jafnmikið holrými neðanjarðar á jafn litlu svæði. Á landsvæði sem er um hálfur ferkílómetri er vitað um fimm kílómetra af hellum og hafa þeir fengið samheitið Laufbalavatnshellar. Við bjóðum ferðir um Skaftáreldahraun, jafnt um gígaröðina sjálfa (Lakagíga) sem hellana í hrauninu, stóra og smáa. Hægt er að skipuleggja hellaferðir í Skaftáreldahraun sem taka fjölmarga daga, þess vegna vikur, en einnig styttri ferðir og helgarferðir.

Leitið endilega tilboða í ævintýralegar ferðir um Skaftáreldahraun og undur þess ofanjarðar og neðan. Að auki bjóðum við spennandi ferðir í Skaftáreldahraun þar sem leitað er að áður ófundnum hellum.